Shumica e zviceranëve për ruajtjen e marrëdhënieve me BE-në

Por, vetëm 17 për qind e zviceranëve e shohin hyrjen në BE si alternativë. Madje nga italianët e Zvicrës, vetëm 7% do ta dëshironin një gjë të tillë

Në një sondazh reprezentativ të realizuar nga instituti për hulumtimin e opinionit M.I.S.Trend, të porositur nga revista javore zvicerane në gjuhën frënge “L`Hebdo”, 69 për qind të të pyeturve u kanë dhënë prioritet  marrëveshjeve bilaterale të Zvicrës me BE-në, para kontingjenteve. Mesataren e kanë “prishur”, zviceranët nga kantoni italishtfolës, Tesina, 64% e të cilëve u kanë dhënë prioritet kontingjenteve të të huajve.

Nga ana tjetër, zviceranët gjermanofonë kanë pasur një përqindje pak më të madhe krahasuar me ata frankofonë, sa u përket bilateraleve. 

Bazuar në këtë sondazh, vetëm 17 për qind e zviceranëve e shohin hyrjen në BE si alternativë  dhe këtu gjermanofonët nuk dallojnë nga frankofonët. Por italianët e Zvicrës, nga kantoni i Tesinës janë edhe më pak të entuziazmuar me hyrjen në BE. Vetëm 7% e tyre do ta dëshironin një gjë të tillë.

Të anketuarit janë përgjigjur edhe lidhur me Bashkimin Evropian si projekt, gjegjësisht besimin e tyre ndaj tij. 59% kanë e kanë përshkruar BE-në si një “projekt paqeje, i cili do të jetë i nevojshëm edhe në të ardhmen”. Por 42% kanë thënë se janë të bindur se BE, si politikisht ashtu dhe ekonomikisht është i dënuar me deshtim. Ndërsa rreth gjysma e të pyeturve BE-në e shohin të suksesshëm nga ana politike por pa ardhmëri nga ana ekonomike.

Më tutje, dy të tretat (69%) e pjesëmarrësve në sondazh e konsiderojnë islamizmin radikal si rrezik strategjik për Evropën dhe Zvicrën, shkruan news.ch. Nacionalizmi rus është në vendin e dytë të rreziqeve strategjike, me 38%. Ndërsa imperializmi kinez vjen në vendin e katërt dhe ai amerikan në të pestin, në listën e rreziqeve.

Janë interesante edhe përgjigjet lidhur me numrin e të huajve në Zvicër. Qëndrimi i tesinezëve është më përjashtues në këtë drejtim: mbi 82 për qind të të anketuarve nga kantoni jugor janë të mendimit se në Zvicër jetojnë “tepër shumë” ose “pak si shumë” të huaj, pavarësisht nëse këta vijnë nga vendet e BE-së apo nga vendet e treta.

Në Zvicrën gjermane 50% mendojnë se në Zvicër ka tepër shumë shtetas të BE-së ndërsa 62% ankohen se ka tepër të huaj nga vendet jashtë BE-së. Në Zvicrën frankofone përqindjet në këto pika janë vetëm pak më të ulëta.