Emery: Granit Xhaka po ndihet keq dhe ne duhet ta mbështesim

“Nuk kam nevojë për kërkim faljen e tij, sepse e di se ai është shkatërruar”

Mesfushori i Arsenalit, Granit Xhaka, nuk do të përballet me gjobë dhe asnjë veprim tjetër disiplinor nga klubi për gjestet e tij drejt tifozëve në barazimin 2-2 ndaj Crystal Palace.

Unai Emery e konfirmoi se Xhaka nuk do të luajë kundër Liverpoolit në Anfield dhe raportohet se klubi i ka ofruar lojtarit ndihmë për t’u këshilluar për gjendjen e tij pas incidentit.

Po ashtu, Arsenali është i shqetësuar për gjendjen e tij të brishtë mendore momentale, saqë as nuk po mendon për një veprim disiplinor ndaj tij.

Një burim i brendshëm i klubit e ka konfirmuar se 27-vjeçari nuk është mirë pas sulmeve që i kishte në fushë, por edhe jashtë saj në rrjetet sociale.

Edhe Emery insiston se çështja e kapitenit aktualisht është në vendin e dytë, pasi në rend të parë është mirëqenia mendore e lojtarit.

“Unë fola me Granit të dielën, dhe të hënën përsëri në stërvitje dhe nuk është e lehtë për të”.

“Nuk kam nevojë për kërkim faljen e tij, sepse e di se ai është shkatërruar”.

“Ai është shumë keq dhe ne duhet ta mbështesim”, ka thënë Emery, përcjell albinfo.ch.

---