Isa Mustafa: Nëse s’ka koalicion LDK-VV, Kurti duhet të gjejë zgjidhje tjetër

Kreu i LDK-së, Isa Mustafa, ka thënë se Lëvizja Vetëvendosje duhet të gjejë zgjidhje tjetër nëse nuk i pranon kërkesat e partisë së dytë. Ka thënë se LDK-ja e ka opsion koalicionin me Vetëvendosjen.

Shefi i LDK-së ka thënë se s’do të ketë takime të tjera me Albin Kurtin, nëse s’ka pajtim për arritjen e një marrëveshjeje.

“A do të ketë takim apo jo, varet se sa do të jetë gatishmëria për të bërë marrëveshje, unë nuk jam që të ketë takime sa për t’u takur, por atë që të ketë takim që ta lidhim marrëveshjen. Për gjëra të tjera jemi shprehur qartë në organet tona. Ne kemi pasur opsion këtë koalicion dhe mbesim pranë këtij koalicioni, nëse bëhet, mirë, nëse jo, Vetëvendosje duhet te gjejë zgjidhje tjetër”, ka thënë Mustafa për RTV21.

Ndërkohë, në Lëvizjen Vetëvendosje kanë konfirmuar se s’kanë planifikuar asnjë takim me zyrtarët e Lidhjes Demokratike të Kosovës.

Ndërkohë, kanë kaluar 105 ditë prej kur u mbajtën zgjedhjet dhe Vetëvendosje doli fituese. 24 ditë kanë kaluar prej se është votuar Kryetari i Kuvendit dhe është hapur mundësia e votimit për Qeverinë e Kosovës, përcjell Albinfo.ch.