Franca mirëpret heqjen e taksës, kërkon rifillimin e dialogut Kosovë-Serbi

Franca mirëpret vendimin e Qeverisë në detyrë të Kosovës të udhëhequr nga Albin Kurti që të heqë plotësisht tarifat ndaj produkteve serbe dhe boshnjake, të cilat u prezantuan në nëntor 2018.

Ambasada e Francës në Prishtinë nëpërmjet një njoftimi thotë se heqja e taksës është një parakusht i rëndësishëm për rifillimin e dialogut për normalizimin me Serbinë.

“Detyra tani është që të rindërtohet gradualisht besimi në mënyrë që negociatat e udhëhequra nga BE të fillojnë së shpejti”.

“Ankesat ekzistuese, për sa i përket barrierave tregtare jo-tarifore, duhet të zgjidhen në kornizën e dialogut ndërmjet Kosovës dhe Serbisë, me lehtësimin e BE-së. Të gjitha vendet, përfshirë Serbia dhe Kosova, po përballen me sfida të mëdha përballë virusit të ri COVID-19. Nuk është koha për manovrim politik. Të dy qeveritë duhet të përqendrojnë të gjitha përpjekjet e tyre në tejkalimin e krizës shëndetësore. Bashkëpunimi rajonal ka një rëndësi të lartë në këtë kontekst”.