Shqiprim Berisha, drejtor i “GC”, klubit me historinë më të madhe në futbollin zviceran

Shqiprim Berisha, i njohur edhe si “Jimmy” është emëruar drejtor menaxherial i klubit të madh, aktualisht në krizë, GC. Ky emërim ka ardhur si rezultat i kalimit të klubit të pronësi të afaristit kinez, Jenny Wang

Shqiprim Berisha, i njohur edhe si “Jimmy” është emëruar drejtor menaxherial i klubit të madh, aktualisht në krizë, GC. Ky emërim ka ardhur si rezultat i kalimit të klubit të pronësi të afaristit kinez, Jenny Wang.

“Grasschoppers” ose siç njihet me emrin e shkurtë “GC”, është klubi futbollistik me historinë më të suksesshme në Zvicër. I themeluar në vitin 1884 ai është klubi më i vjetër i Cyrihut dhe ndër më të vjetrit në Zvicër.

Por, që nga viti i kaluar GC ka pësuar rënien e madhe: Ai ka rënë për herë të dytë në historinë e tij nga Liga superiore (superliga) zvicerane në Challengue League, shkruan albinfo.ch. Për herë të parë kjo i kishte ndodhur 70 vite më parë.

Siç shkruan blick.ch në një intervistë me Berishën, drejtuesit e rinj synojnë që Grasschopers-in ta bëjnë sërish të madh. Jo vetëm ta kthejnë në shoqërinë e vjetër, në superligë, por edhe ta bëjnë kampion.

38 vjeçari, me profesion laborant i kimisë, është prej vitesh aktiv në biznesin e futbollit dhe si këshilltar i futbollistëve të ndryshëm. Në intervistën e përmendur “Jimmy” tregon se si ka ardhur në kontakt me investitorin e ri kinez, pastaj për planet që kanë për të ardhmen e GC etj.

“Së bashku me Samuel Koch, sekretar i ri gjeneral i GC kemi prej kohësh kontakte të mira me investitorin. Ne kemi vendiosur pastaj kontaktin në mes të GC dhe Jenny Wang. Në fund, pronari i ri i klubit më ka ofruar këtë punë dhe unë e kam pranuar”, shprehet ai.

Gazeta thotë se Berisha njihet personalisht me këshilltarin e Cristiano Ronaldos, Jorge Mendes, përcjell albinfo.ch. Ky i fundit i ka siguruar atij dhe Haas-it njohjen me kinezin, pronar i ri i GC.

Nisur nga kjo, pyetja e blick.ch për Shqiprim Berishën është: sa ka shanse që tani CR7 të përfundojë karrierën në fanellën e GC? Berisha thotë se “nuk do ta vlerësoja si të madhe këtë mundësi. Por: kurrë mos thuaj kurrë. Megjithatë, siguirisht do të ishte mirë që Ronaldo të vijë njëherë për vizitë tek ne”.

Drejtori i ri thotë se me blerjen e klubit nga Wang, hapet edhe “qesja” për të siguruar lojtarë të kategorisë së parë. Por, për emra konkretë është ende herët.

---