Tirana, drejt normalitetit

©FB/Bashkia e Tiranës

Është bërë e ditur se në Shqipëri hap pas hapi vendi po i kthehet një normaliteti të ri, edhe pse disa qytete ende vazhdojnë të kenë kufizime, sidomos sa i përket daljes së qytetarëve dhe qarkullimit të makinave, përcjell albinfo.ch.

Së fundi, në rrugët e kryeqytetit vihen re lëvizje të shumta edhe pas orës 17.30, kur nis dhe ndalim-qarkullimi. Pavarësisht kësaj, duket se edhe policia është tërhequr nga vrojtimi i imtësishëm i zbatimit të masave.

Duhet theksuar se tashmë në qytet nuk ka më postblloqe dhe numri i uniformave blu është reduktuar ndjeshëm.

Nga data 11 maj nisën lehtësime masash për një grup biznesesh, si parukeri, berber, dentist dhe dyqanet në qendrat tregtare, ndërkohë që duke nisur nga e hëna e kësaj jave, më 18 maj, do të nisë edhe hapja e njësive të shërbimit si bare dhe restorante, vetëm për mjediset e hapura.

Po ashtu, numri i rasteve të prekura me COVID-19 në Shqipëri që nga nisja e epidemisë është 880 persona, ndërkohë 31 qytetarë kanë humbur jetën. /Albinfo.ch