Falja në sheshin e Prishtinës shkakton shumë reagime

Besimtarët myslimanë po kërkojnë hapjen e xhamive në Kosovë

Një numër i besimtarëve myslimanë, kanë dalur sot në sheshin “Skënderbeu”, në Prishtinë, për t’i kryer ritet fetare.

Namazi i besimtarëve myslimanë, që u realizua në ambient e hapur, është si shenjë proteste për mbylljen e xhamive.

Duke mos dashur të prononcohen për medie, grupi organizativ i këtij aktiviteti, tha se kanë vendosur që të mos prononcohen për medie dhe se të gjitha njoftimet do t’i bëjnë në mënyrë elektronike në faqen e tyre “Falu në shesh”, shkruajnë mediat vendore, përcjell albinfo.ch.

Ndryshe, grupi organizativ “Falu në shesh”, gjatë ditës ka dorëzuar kërkesë për hapjen e xhamive në BIK dhe MSH, si dhe kanë njoftuar Policinë e Kosovës për këtë aktivitet.

Lidhur me këtë ka reaguar Ministri në detyrë i Punëve të Brendshme të Kosovës, Xhelal Sveçla.

“Jam informuar se sot pasdite, një grup ‘qytetarësh anonimë’ po nxit organizimin e një proteste që është kundër vendimeve të MSh-së të marra sipas rekomandimeve të IKSHP-së, dhe në dakordim të plotë me Bashkësinë Islame të Kosovës. Kemi gjithashtu informacione se pas këtyre organizimeve qëndron publicisti Milazim Krasniqi. I ftoj të gjithë qytetarët të tregojnë maturinë dhe vullnetin e plotë për të mos rënë viktimë e politizimit të riteve fetare”, ka shkruar Sveçla në Facebook.

I menjëhershëm ka qenë reagimi i profesorit Milazim Krasniqi, i cili po ashtu në Facebook, ka shkruar se deklarata e Sveçles, është gënjeshtër.

“Deklarata e Xhelal Sfeçlës se gjoja unë qëndroj pas ndonjë thirrjeje për të falë namaz në shesh është qind për qind gënjeshtër. Është e pakuptueshme dhe e turpshme që të gënjejë në këtë mënyrë një zyrtar i lartë i qeverisë. Asnjë thirrje të tillë, asnjë organizim të tillë nuk kam ftuar, as nxitur asnjëherë”, ka shkruar Krasniqi, i cili është deklaruar pro hapjes së xhamive.

---