Konjufca vendimin e Gjykatës e quan “skandaloz”

Gjykata Kushtetuese e Kosovës ka vendosur që t’i japë të drejtë Presidentit të Kosovës, Hashim Thaçi rreth dekretit për mandatarin e Qeverisë.

Kushtetuesja vlerësoi se Presidenti ka vepruar në përputhshmëri me ligjin me rastin e mandatimit të Avdullah Hotit për kryeministër nga LDK-ja, përcjell albinfo.ch.

Këtë vendim, ministri në detyrë i Punëve të Jashtme, Glauk Konjufca në Rubikon në Klan Kosova, e ka quajtur “skandaloz”, ndërsa ka thënë që ky vendim do të shkaktojë “revoltë qyrtetare”.

“Revolta vjen prej pakënaqësisë së natyrshme që nuk ka me pasë të votohet më në Kosovë dhe tash e tutje krijohet një sistem politik në të cilin nëse nuk e ke fituar 51 % të votave, nuk ke fituar asnjë votë.

Gjithçka më pak se 51 e votave, ia garanton partnerit të koalicionit që të të rrëzojë kur të dojë dhe të bëjë marrëveshje brenda 25 minutave me partitë opozitare”.