Zvicër: Maskat dhe karantina, pothuaj pa ndikim në numrin e infeksioneve

Në këtë përfundim ka ardhur Zyra Federale për Mbrojtjen Civile, në raportin e saj të monitorimit për muajin korrik, të botuar të mërkurën

Detyrimi i mbajtjes së maskës në transportin publik dhe karantina për ata që vijnë nga zonat e rrezikut nuk kanë pothuajse fare ndikim ose “vetëm një ndikim të vogël” në numrat e rasteve të infeksionit me Covid 19, shkruan sda.

Në këtë përfundim ka ardhur Zyra Federale për Mbrojtjen Civile, në raportin e saj të monitorimit për muajin korrik, të botuar të mërkurën, transmeton albinfo.ch. Raporti përfshin periudhën nga 4 deri më 29 korrik.

Sipas raportit të monitorimit, rritja e numrit të rasteve ka ardhur kryesisht si pasojë e ngjarjeve me numër të madh të pjesëmarrësve. Këtu përfshihen diskotekat, baret, shkollat dhe aktivitetet e kopshteve të fëmijëve parashkollorë.

Por, sipas këtij informacioni, autoritetet shpesh nuk e dinë se ku janë infektuar saktësisht njerëzit, përcjell albinfo.ch. Gjurmimet e kontaktit tregojnë se, megjithë marrjen intensive në pyetje, burimi i infeksionit shpesh nuk mund të përcaktohet, thuhet veç tjerash në raportin e monitorimit.

---