Pas skandalit me dosjet e UÇK-së, dorëhiqet zyrtari i lartë i Tribunalit të Hagës

Pas skandalit me dosjet që u dërguan në zyrat e veteranëve të UÇK-së ka dhënë dorëheqjen njëri prej prokurorëve kryesorë të Hagës. Këto dosje thuhet se kanë zbuluar emra të dëshmitarëve dhe dëshmitë e tyre

Zëvendësprokurori në Zyrën e Prokurorit të Specializuar, Kwai Hong Ip, ka dhënë dorëheqje, pasi mijëra dosje, që ndër të tjera, thuhet se përmbajnë emra të dëshmitarëve dhe dëshmitë e tyre, kanë rënë në dorë të veteranëve të UÇK-së, shkruan Gazeta Express në një raport të saj.

Gazeta në fjalë thotë se ka kontaktuar sot Zyrën e Prokurorit të Specializuar rreth dorëheqjes së zëvendësprokurorit, por ZPO-ja nuk e ka komentuar këtë çështje.

Në cilësinë e Prokurorit të Specializuar, Kwai Hong Ip ka intervistuar pjesëtarë të UÇK-së që janë thirrur në Hagë si të dyshuar.

Express ka mësuar se skandali i dosjeve që u dërguan në OVL-UÇK është arsyeja e largimit të zv.prokurorit.

Ndërkaq çështja e mijëra dosjeve që organizata e vereranëve të UÇK-së thotë se u kanë ardhur në zyrë është akoma krejt mister. Nuk dihet se nga kush u sollën, por udhëheqës të organizatës thonë se ajo përmban të dhëna nga hetimet që po i kryen Tribunali Special.

Organizata e veteranëve të UÇK-së, që e kundërshton ekzistencën e Tribunalit Special, thotë se në dosjet  që u kanë ardhur në zyrë gjenden dokumente origjinale të Tribunalit.

Zyrtarë të Speciales e kanë bastisur hy herë zyrën e OVL-UÇK-së dhe i kanë konfiskuar dokumentet që u kanë sjellë persona të maskuar dy herë brenda dy javëve.

Ip është avokat britanik me përvojë të gjerë si prokuror ndërkombëtar edhe në Ballkan Perëndimor. Ai ka qenë zëvendësi i Schwendiman edhe si Prokurori i Specializuar dhe si Kryeprokurori i Task Forcës Hetimore Speciale (TFHS), paraprijësi i Zyrës së Prokurorit të Specializuar.

Ip iu bashkëngjit TFHS-së në qershor 2012 si Zëvendëskryeprokuror dhe shërbeu si Kryeprokuror në Detyrë nga gusht 2014 në maj 2015 pas largimit të Kryeprokurorit të parë, Ambasadori Clint Williamson dhe para ardhjes së Schwendiman.

Zyra e Prokurorit të Specializuar, heton krimet që pretendohet se janë kryer nga ish pjesëtarët e UÇK-së, nga vitit 1998 deri në fund të viti 2000.

Kjo zyrë tashmë ka dorëzuar aktakuzë për krime lufte edhe ndaj presidentit Hashim Thaci dhe ish-kryeparlamentarit Kadri Veseli, që përbënin udhëheqjen e UÇK-së gjatë luftës në Kosovë.

---