Franca do të hyjë në një bllokim të ri

(AP Photo/Michel Spingler)

Presidenti francez, Emmanuel Macron, ka njoftuar se masat e bllokimit do të rifuten në gjithë vendin nga mesnata e së enjtes për të luftuar një rritje në rastet e COVID-19, shkruan Euronews, transmeton Albinfo.ch.

Shkollat ​​dhe çerdhet do të qëndrojnë të hapura, shtoi ai.

Evolucioni i virusit në Francë ka tejkaluar “edhe parashikimet më pesimiste”, tha presidenti.

Adresimi i tij vjen vetëm disa orë pasi Gjermania njoftoi një bllokim të kufizuar për të filluar më 2 nëntor, i cili parasheh restorantet, baret dhe teatrot të mbyllen, përcjell tutje Albinfo.ch.

Kancelarja gjermane, Angela Merkel, tha se masat ishin një përpjekje për të shmangur “një emergjencë akute shëndetësore kombëtare”.

Gjermania regjistroi 15,000 raste të reja të mërkurën, një rekord për kombin, i cili kishte dalë më mirë se fqinjët e saj gjatë verës dhe shmangu një bllokim total në modelin e Mbretërisë së Bashkuar dhe Francës.

Gjithashtu të mërkurën Presidentja e Komisionit Evropian, Ursula von der Leyen, paralajmëroi se evropianët do të përjetojnë një “Krishtlindje të ndryshme” këtë vit. “Ne jemi thellë në valën e dytë”, tha ajo.