Kosova e Shqipëria, konsullatë të përbashkët në Strugë

Ministri i Jashtëm i Shqipërisë, Gent Cakaj, ka bërë të ditur arritjen e një bashkëpunimi diplomatik mes Kosovës dhe Shqipërisë.

Ai ka shkruar se tanimë zyrtarisht është marrë vendimi për bashkimin e hapësirave të Konsullatave të Përgjithshme të dy vendeve në qytetin e Strugës.

Cakaj ka thënë se edhe po të duket simbolik ky vendim, është dëshmi se synimi për shërbim diplomatik të përbashkët po vazhdon.

Deklarata e plotë:

Edhe dy fjalë për diçka domethënëse.

Tashmë jemi marrë vesh zyrtarisht për bashkim të hapësirave të Konsullatave të Përgjithshme të dy vendeve tona në qytetin e Strugës. Sado simbolik të duket ky veprim, është megjithatë një dëshmi e prekshme, se zbatimi i projektit të shfrytëzimit të përbashkët të hapësirave të ambasadave a konsullatave mes Kosovës e Shqipërisë po vazhdon. Ky projekt duhet të vazhdojë me çdo kusht në çdo vend ku ka mundësi objektive.

Nga ana tjetër, edhe marrëveshja e nënshkruar nga partitë politike shqiptare të Luginës së Preshevës, për të vepruar si një forcë e vetme në Medvegjë mbart një rëndësi të veçantë. Deri sa të ketë unitet e mobilizim të brendshëm, edhe angazhimi ynë kundër procesit të fshirjes së adresave do të bëhet më i fuqishëm.

S’ka fjalë, ndërkaq, se ne do të vazhdojmë përpjekjen tonë për të shtuar mbështetjen politike dhe institucionale, veçanërisht për shqiptarët në Medvegjë, Bujanoc dhe Preshevë.