“Stuttgart Airways” akuzohet për mashtrim

Themeluesi i kompanisë kosovare “Karrota”, njëherësh ish-deputeti i Lëvizjes Vetëvendosje, Fisnik Ismaili, ka denoncuar një rast mashtrimi.

Përmes një postimi në “Facebook”, Ismaili ka treguar se si një person me emrin Mërgim Gashi e ka mashtruar atë, duke mos e paguar për një punë, të cilën ai me kompaninë e tij e kanë kryer për të.

Ismaili ka thënë se Gashi i është paraqitur si pronar i një aviokompanie në Gjermani me emrin “Stuttgart Airways”.

Pronari i pretenduar i kësaj kompanie ka kërkuar nga kompania “Karrota” që t’ia punojë logon dhe uebsajtin e kompanisë, punë të cilat Ismaili thotë t’i kenë kryer “bukur dhe shpejt”, por që për shërbimin thotë të mos ketë marrë kurrë pagesë.

“Nuk më ka ndodhë me u ankue ndonjëherë për klientë të këqij, sepse me secilin në një moment kam komunikue sinqertë edhe i kemi mbyllë gjanat, qoftë me marrëveshje ose gjyq. Por, ky person të cilit po ia kushtoj këtë status po del se ka mashtrue shumë njerëz, si pronar i një avio-kompanie në Gjermani, edhe e ndjej obligim moral me e bë këtë gjë publike, në mënyrë që të tjerët mos me ra pre e këtij mashtruesi. Ky mashtrues quhet Mërgim Gashi (FB e ka deaktivizue), ndërsa kompania quhet Stuttgart Airways. Para fiks një viti i ka kërkue kompanisë time logo dhe website, të cilën ia kemi krye me sukses, bukur dhe shpejt (website-in ia kemi deaktivizue për shkak të mospagesës)”, thotë Ismaili.