Nuk ka bllokim trafiku në Gotthard, sepse mungojnë gjermanët dhe holandezët

Është raportuar një kolonë prej 3 kilometrash të makinave të enjten në mbrëmje - që nuk mund të krahasohet me 10 deri 15 kilometrat "normale" para vitit 2020

Në prag të çdo feste, zviceranët, por edhe fqinjët e tyre veriorë, ia mësyjnë jugut me diell.

Dhe, duke qenë se pothuaj të gjitha rrugët drejt jugut, Ticinos, i bien nëpër tunelin e Gotthard-it, kolonat dhe bllokimi i rrugëve është të thuash i paraprogramuar, shkruan albinfo.ch.

Por sivjet vjen një lajm i mirë për të gjithë ata që pëlqejnë Ticinon dhe nuk e pëlqejnë bllokimin e trafikut: bllokime të  mëdha ose kolona të gjata të Pashkëve në Gotthard nuk do të ndodhin në vitin 2021, sikundër nuk kishin ndodhur as në vitin 2020, për shkak të pandemisë, shkruan 20minuten.ch.

TCS (Touring Club Schweiz) ka raportuar një kolonë prej 3 kilometrash të makinave të enjten në mbrëmje – një gjatësi që nuk mund të krahasohet me 10 deri 15 kilometrat që ishin normale në vitet para vitit 2020.

Por, megjithatë ka pak më shumë makina se në vitin 2020, kur nuk kishte fare bllokime të trafikut në rrugën drejt jugut gjatë bllokimit të Pashkëve.

Angela Pasquariello nga Viasuisse e thotë për 20minuten arsyen e qetësisë në Gotthard. “Nuk është krejtësisht e papritur. Mungojnë gjermanët dhe holandezët, të cilët zakonisht kalojnë me makina nëpër Gotthard gjatë Pashkëve dhe më pas shkojnë në Itali”.

“Tani jemi kuriozë të shohim si do të duket pas Pashkëve, nëse të gjithë zviceranët gjermanofonë do të nisen menjëherë në Ticino”, thotë Pasquariello. Bllokime të gjata të trafikut gjithashtu nuk priten as për udhëtimin e kthimit.

---