Gjermani: Bursa për gjimnazistët e Podujevës për t’i vijuar studimet jashtë

Bëhet e ditur se bursa që do të ofrohet ka vlerën rreth 830 euro në muaj dhe do të vlejë gjatë gjithë periudhës së studimeve

Komuna e Podujevës ka njoftuar se në kuadër të projektit të binjakëzimit me komunën e Velbertit në Gjermani, kanë pranuar ftesën për bashkëpunim në fushën e edukimit, ku ofrohen bursa studimi për gjimnazistët e Podujevës, për studime në Gjermani e Holandë.

“Të gjithë nxënësit e gjimnazit “Aleksandër Xhuvani” njoftohen që në kuadër të projektit të binjakëzimit të komunës sonë me komunën e Velbertit në Gjermani kemi pranuar ftesën për bashkëpunim në fushën e edukimit, ku për nxënësit e shkollës “Aleksandër Xhuvani”, nga kjo gjeneratë e diplomuar dhe gjeneratat e kaluara do të ofrohen bursa për studime në fushën e edukimit për nivelin fillor”, thuhet në komunikatën për medie të kësaj komune.

Sipas komunikatës, “Projekti do të implementohet nga dy universitete partnere: Kolegji “Berufskolleg Bleibergquelle” në Velbert-Gjermani dhe Universitetin “Stenden” në Meppel- Holandë, që do të thotë se nxënësit përfitues të bursës do të kenë mundësi të studiojnë 2 vjet në shtetin e Gjermanisë dhe 2 vjet të tjera në shtetin e Holandës”.

Bëhet e ditur se bursa që do të ofrohet ka vlerën rreth 830 euro/muaj dhe do të vlejë gjatë gjithë periudhës së studimeve.

Programi do të zhvillohet në gjuhën angleze dhe kriter i nevojshëm për pranim do të jetë njohuritë e mira të gjuhës angleze.

“Të gjithë të interesuarit duhet të dorëzojnë CV e tyre deri të premten, më 16.07.2021 në email adresën: [email protected] apo në faqen zyrtare të shkollës”, thuhet në komunikatë.

Për të gjithë kandidatët që do të jenë në listën e ngushtë, do të realizohet testi dhe intervista nga përfaqësuesit e kolegjit përmes platformave te komunikimit online.

Studimet do të fillojnë në vitin e ri akademik nga muaji tetor.

“Për realizimin e këtij projekti falënderojmë bashkatdhetarin tonë në Velbert, njëherit iniciues i projektit te binjakëzimit, z. Rrahman Islami, i cili në vazhdimësi është duke bërë përpjekje që të përfitojmë sa më shumë nga ky projekt si komunë në të gjitha fushat”, thuhet në komunikatë.

 

---