Këto janë rregullat e reja për kalimin transit nëpër Slloveni

Meqë ka hyrë në fuqi një ndryshim rregullash, albinfo.ch ka kërkuar nga Ambasada e Republikës së Sllovenisë në Zvicër, hollësi lidhur me rregullat në fjalë

Pushimet verore (të shkollave) kanë filluar në disa kantone të Zvicrës. Nga fundi i kësaj jave ato fillojnë edhe në kantonin me numrin më të madh të banorëve, në Cyrih.

Kjo pasqyrohet edhe në numrin e shtuar të atyre që marrin rrugën drejt destinacioneve të pushimit. Për shumë banorë të Zvicrës, sidomos për ata me prejardhje nga Ballkani, kjo rrugë shkon nëpër Slloveni, Kroaci e tutje.

Shqiptarët, ata nga Kosova, Maqedonia e Veriut dhe Shqipëria, janë ndër frekuentuesit kryesorë të kësaj rruge. Për këtë arsye, shumë prej tyre, të preokupuar me ndryshimin e paralajmëruar të rregullave të udhëtimit transit nëpër Slloveni, i janë drejtuar platformës sonë, albinfo.ch me pyetje lidhur me këtë shqetësim.

albinfo.ch ka kërkuar nga Ambasada e Republikës së Sllovenisë në Zvicër, hollësi lidhur me rregullat në fjalë.

Në përgjigjen elektronike që kemi marrë nga kjo ambasadë thuhet se , në parim, për të gjithë vlen “rregulla e artë e 3 G-ve (Geimpft, Getestet Genesen, ose: I vaksinuar, i testuar, i shëruar).

Në vijim, përgjigja: Duke filluar nga 15 korriku të gjithë atyre që do të hynë në Slloveni do t’ju duhet një nga dokumentet e mëposhtëm:
– Certifikatë Covid, e cila konfirmon se jeni vaksinuar dhe se kanë kaluar të paktën 14 ditë nga vaksinimi i dytë
OSE
– Një dokument që konfirmon se keni vuajtur nga Covid në 6 muajt e fundit
OSE
– Një konfirmim i shtypur (SMS ose email nuk është i mjaftueshëm) i një PCR negativ ose i testit të shpejtë të antigjenit. Testi PCR nuk bën të jetë më i vjetër se 72 orë ndërsa testi i shpejtë jo më i vjetër se 48 orë.

Fëmijët nën 15 vjeç që shoqërohen nga prindërit e tyre përjashtohen nga certifikata e testit, pra, nuk kanë nevojë për një të tillë!

E GJITHË KJO Vlen për udhëtarë të tranzitit!

---