50 veta rezultojnë pozitivë, e tërë Qendra federale e Azilit, në karantinë

Në konsultim me autoritetet federale, është vendosur në karantinë ose në izolim i gjithë institucioni. Rreth 100 persona janë prekur nga ky karantinim

Qendra Federale e Azilit Bässlergut në Bazel është karantinuar në tërësi të enjten për shkak të shpërthimit masiv të koronës në këtë qendër. 50 banorë të saj që kanë rezultuar pozitivë me koronën, janë izoluar, raporton srf.ch.

Për shkak të konstatimit të akumulimit të një numri të rasteve individuale, në Qendrën Federale të Azilit ishte urdhëruar të bëhej testimi masiv. Kështu ka njoftuar të premten Departamenti i shëndetësisë në Bazel, transmeton albinfo.ch.

Në konsultim me autoritetet federale, pas kësaj është vendosur në karantinë ose në izolim i gjithë institucioni. Rreth 100 persona janë prekur nga ky karantinim.

Të infektuarit kanë një rrjedhë shumë të butë të sëmundjes, bën të ditur Drejtoria e shëndetësisë. Qendra Federale e Azilit është duke marrë mbështetje epidemiologjike.

---