Në Kosovë, si turistë  

Po sikur këtë verë të udhëtoni drejt Kosovës edhe si turistë?  

Të merrni në valixhe veshje dhe këpucë të përshtatshme për aktivitete në natyrë. Të planifikoni disa netë në “hotelet miliona-yjëshe”, që ne i njohim si bujtina, ku përjetohet mikpritja tradicionale. T’ju mbushet zemra plot me panoramat e mahnitshme të Kosovës teksa ngjiteni nëpër Via Ferratat e Pejës, Prizrenit dhe Deçanit. 

Në çdo vakt t’ju shërbejnë me pjata që kanë shijen e vendlindjes. 

Ta provoni ndjesinë e fluturimit në Zipline në Rugovë apo pas një dite ecjeje nëpër mal, ta shihni lindjen e diellit nga Maja e Gjeravicës.

Të kaloni një natë në pyll me familjarët dhe shoqërinë, në mëngjes të bëni joga dhe të ecni nëpër shtigje të reja, për t’i takuar më pas arinjtë e shpëtuar nga robëria.

Të relaksoheni në natyrën e butë të Gollakut. Të ekploroni bukuritë e Pejës për një, dy apo sa ditë që të dëshironi. T’i rezervoni të gjitha këto përvoja dhe aktivitete me vetëm një “klik” në platformën www.kosovopass.com   

Ky numër special veror i revistës Albinfo përkujdeset që këto përvoja dhe informata interesante t’i keni në një vend. Ju urojmë lexim të këndshëm dhe pushime të paharrueshme.   

Përkrahja zvicerane për zhvillimin e turizmit në Kosovë  

Që nga viti 2014, Agjencia Zvicerane për Zhvillim dhe Bashkëpunim (SDC) përkrah zhvillimin e turizmit në Kosovë përmes projektit Promovimi i Punësimit në Sektorin Privat (PPSE) që implementohet nga organizata Swisccontact në partneritet me Institutin Riinvest. Në kuadër të kësaj përkrahjeje janë zhvilluar produkte të reja turistike që e kanë pasuruar ofertën e vendit, janë zhvilluar programe për ngritjen e kapaciteteve që kanë avancuar shërbimet dhe Kosova është promovuar si destination turistik tërheqës. Kjo përkrahje ka kontribuuar në rritjen e punësimit dhe të të hyrave për komunitetin vendor.  

Materiali në seksionin special për turizmin i përfshirë në numrin veror 2021 të revistës Albinfo është përgatitur në bashkëpunim me projektin PPSE.  

(Linda Baleta, Menaxhere për Komunikim dhe PR, Swisscontact Evropa Lindore)

---