Danimarka heq maskat e fundit, edhe ato në transportin publik

Detyrimi i mbajtjes së maskës për pasagjerët në transportin publik lokal fillimisht ishte menduar të hiqet më 1 shtator

Nga e shtuna, në Danimarkë nuk do të ketë më detyrim për mbajtje të maskës mbrojtëse, në autobus, tren ose traget, shkruan srf.ch.

Detyrimi i mbajtjes së maskës për pasagjerët në transportin publik lokal fillimisht ishte menduar të hiqet më 1 shtator, transmeton albinfo.ch. Por tani ai vendim është anuluar, ka njoftuar të premten Ministria Daneze e Transportit.

Arsyeja për këtë është se tashmë është fshirë rekomandimi i autoriteteve shëndetësore për të mbajtur distancë prej një metër në hapësirat publike.

Sipas ministrisë, heqja e detyrimit për mbajtje të maskës ishte “një pasojë e natyrshme” e “fshirjes” në fjalë.

Danezëve në të vërtetë pothuajse që nga mesi i qershorit nuk u është dashur të mbajnë maska​​.

Përjashtimi i vetëm tani vazhdon të jetë trafiku ajror: Nëse fluturoni, detyrimi për mbrojtjen e gojës dhe hundës zbatohet akoma, pasi, sipas Ministrisë së Transportit, trafiku ajror bie nën rregullat ndërkombëtare.

---