Zvicër: 2993 infeksione të reja me Covid-19 dhe 6 raste të vdekjes

Aktualisht 215 pacientë me Covid-19 janë në kujdes intensiv. Kjo është 76 për qind më shumë në krahasim me javën e kaluar

Zyra Federale e Shëndetit Publik (BAG) ka raportuar në pasditen e sotme 2993 raste të reja pozitive me koronavirus, të shënuara në 24 orët e fundit.

Kjo e vë mesataren 7-ditore në 2561 raste në ditë që është 26 për qind më shumë se në javën e kaluar, shkruan srf.ch.

Me trendin aktual, mesatarja 7-ditore e infeksioneve të reja dyfishohet afërsisht çdo 21 ditë, transmeton albinfo.ch. Incidenca 14-ditore është aktualisht 370.62.

BAG raporton gjithashtu 97 shtrime të reja në spitale, mesatarja 14-ditore është 52 shtrime  në ditë.

Kjo është 39 për qind më shumë në krahasim me javën e kaluar. 788 persona aktualisht janë duke u trajtuar në spital për Covid-19 ose 48 për qind më shumë se në javën e kaluar.

Aktualisht 215 pacientë me Covid-19 janë në kujdes intensiv. Kjo është 76 për qind më shumë në krahasim me javën e kaluar.

Shtretërit e kujdesit intensiv në spitalet zvicerane (përfshirë shtretërit ad-hoc) aktualisht janë të zënë në masën 77 për qind. Nga kjo, 25 për qind janë të zënë nga të prekurit nga Covid 19.

BAG raporton 6 raste të reja të vdekjes. Mesatarja 7-ditore është 3 të vdekur.

Norma mesatare pozitive 7-ditore është aktualisht 13.2 përqind. Kjo do të thotë se nga 100 teste, mesatarisht rreth 13 teste ishin pozitive, përcjell albinfo.ch. Krahasuar me javën e kaluar, norma pozitive është rritur me 1 pikë përqindje.

Numri i testeve të kryera në një mesatare prej 7 ditësh është 23,064 teste në ditë dhe kështu është rritur me 16 për qind në krahasim me javën e kaluar.

---