Rekord trishtues i koronavirusit në Austri: Rreth 10 mijë raste të reja, brenda 24 orëve

Kjo është shifra më e lartë e infeksioneve që nga fillimi i pandemisë

Austria po përjeton një rekord trishtues për numrin e rasteve pozitive me koronavirus.

9,943 infeksione të reja brenda 24 orëve janë shifrat më të larta të të gjitha kohëve që nga fillimi i pandemisë, raporton albinfo.at.

Numri më i lartë i rasteve ishte arritur vitin e kaluar, më 13 nëntor 2020. Në atë kohë ishin regjistruar 9.586 infeksione të reja, ndërkohë që prej asaj ditë shifrat kishin pësuar rënie.

Në anën tjetër, aktualisht mesatarja shtatëditore përmban 7.148 raste pozitive në ditë. Vetëm javën e kaluar 137 persona kanë humbur jetën ndaj koronavirusit.

Kjo situatë nëpër të cilën po kalon gjithë Austria ka bërë që të premten në mbrëmje qeveria austriake të marrë masa drastike.

Nga dita e hënë, më 8.11. qeveria austriake ka vendosur që të zbatojë rregullin 2G (i vaksinuar apo i shëruar) për të gjithë personat e moshës mbi 12 vjeç.

Ndërkohë, ata që ende ngurrojnë të vaksinohen, nuk do të lejohen të hyjnë në restorante, kafene dhe në të gjitha hapësirat e tjera, të cilat mund të shfrytëzohen gjatë kohës së lirë, edhe nëse janë të testuar.

Sipas mediave austriake, numri i rasteve të reja me koronavirus pritet të arrijë deri në 20 mijë në dy javët e ardhshme.

 

---