Mërgata Fest & Sport mbledh bashkatdhetarët tri ditë rresht në Lipjan

Përveç muzikës, ku do të performojnë emra të njohur të estradës kosovare, do të ketë edhe aktivitete sportive me karakter garues.

Vera sjell gjithmonë në Kosovë bashkatdhetarët që jetojnë në vende të ndryshme të botës. Institucionet vendore përpiqen që t’ua bëjnë më të këndshëm qëndrimin, përmes aktiviteteve të ndryshme. Një të tillë sivjet e organizon Komuna e Lipjanit, raporton Albinfo.ch.

Mërgata Fest & Sport është aktiviteti treditor i organizuar nga Komuna e Lipjanit, e që mbahet më 8, 9 dhe 10 gusht në Sheshin “Adem Jashari” në Lipjan.

Përveç muzikës, ku do të performojnë emra të njohur të estradës kosovare, si Sabri Fejzullahu, Grupi “Ilirët”, Teuta Selimi e të tjerë, gjatë këtyre ditëve do të ketë edhe aktivitete sportive.

Sipas njoftimit të këtij festivali, aty do të ketë parakalim të motoristëve e çiklistëve, dhe do të ketë lojëra me karakter garues, siç është volejbolli i plazhit, ping pongu, shahu, mundje krahu e pikado./Albinfo.ch

---