Mehaj: 50 milionë euro janë zotuar për armatimin e FSK-së

Buxheti i Ministrisë së Mbrojtjes ka qenë 67 milionë euro, në qeverinë tonë është rritur në 102.3 milionë, tha Mehaj

Ministri i Mbrojtjes, Armend Mehaj ka thënë se janë zotuar 50 milionë euro për blerje të armatimit për Forcën e Sigurisë së Kosovës.

Ai i bëri komentet në një postim në Facebook ku ka thënë se i publikoni disa nga blerjet që janë bërë nga Ministria e Mbrojtjes për t’iu shmangur keqinformimit, raporton Albinfo.ch.

“Brenda periudhës së qeverisjes së deritanishme janë zotuar mbi 50 milionë euro blerje të armatimit. Kaq buxhet për kaq ditë qeverisëse, nuk ka ndarë asnjë qeveri më herët. Buxheti i Ministrisë së Mbrojtjes ka qenë 67 milionë euro, në qeverinë tonë është rritur në 102.3 milionë”, ka shkruar Mehaj.

Tutje ai ka thënë se vetëm për një vit e gjysmë janë rekrutuar 1240 ushtarë të rinj, ndërsa së shpejti do të hapet konkursi edhe për 612 ushtarë aktivë dhe 367 ushtarë rezervë.

“Këtë vit, deri më tani kemi zotuar 28.6% të buxhetit për blerje. Kjo përqindje do të dyfishohet brenda javëve të ardhshme, kur do të përmbyllen blerjet që janë në proces.

Ministria e Mbrojtjes, vitin që lëmë pas ka shpenzuar 96% të buxhetit, njëherit përqinjda më e lartë e shpenzimit të buxhetit ndonjëherë. Këtë nivel do ta mbajmë edhe në vazhdim”, ka thënë Mehaj./Albinfo.ch/

---