Avionë rus shkelin hapësirën ajrore të Finlandës

Finlanda ka nisur tashmë një hetim për shkeljen e hapësirës ajrore.

Ministria e Mbrojtjes finlandeze njoftoi se dy avionë ushtarakë rusë MiG-31 shkelën hapësirën ajrore të Finlandës sot, pranë qytetit Porvoo në Gjirin e Finlandës.

Shefi i komunikimit i ministrisë finlandeze, Christian Vakuri, i tha Reuters se shkelja ka ndodhur rreth orës 08:40 të mëngjesit të sotëm dhe avionët ishin nisur drejt perëndimit, duke shtuar se avionët rusë ishin në hapësirën ajrore finlandeze për dy minuta.

“Ata hynë në hapësirën finlandeze një kilometër,” tha Vakuri, pa specifikuar nëse avionët u shoqëruan jashtë hapësirës ajrore finlandeze.

Ministria ruse e Mbrojtjes njoftoi sot se ka zhvendosur tre avionë MiG-31 të pajisur me raketa hipersonike në enklavën e Kaliningradit.

 

---