Në Shqipëri remitencat arrijnë nivelin më të lartë që nga 2010-a

Edhe në gjashtë muajt e parë të këtij viti kanë vazhduar të rriten paratë që emigrantët dërgojnë tek të afërmit e tyre.

Edhe në gjashtë muajt e parë të këtij viti kanë vazhduar të rriten paratë që emigrantët dërgojnë tek të afërmit e tyre.

Sipas bilancit të pagesave të Bankës së Shqipërisë, gjatë periudhës janar-qershor 2022 emigrantët dërguan në shtëpi 376 milionë euro, me një rritje prej 10.6% në krahasim me të njëjtën periudhë të një viti më parë.

Ky është niveli më i lartë i remitencave që nga viti 2010.

Të ardhurat e migrantëve kulmuan nga vitit 2000, kur të ikurit e viteve 90 u stabilizuan dhe filluan të dërgonin para në shtëpi deri në vitin 2009. Më pas filloi trendi rënës i tyre, që ishte i lidhur me ciklin e emigracionit, ku të ikurit pas një periudhë prej 10-15 vjeçare fillojnë e i shkëpusin lidhjet gradualisht më vendin mëmë, raporton monitor, përcjell Albinfo.ch.

Ky cikël rënës vijoi deri në 2013-n. Më pas filloi tendenca rritës e qëndrueshme (me përjashtim të 2020-s, që përkon me periudhën pandemike), duke kulmuar në 2022-n.

Sipas ekspertëve, kjo prirje lidhet me rigjallërimin e emigracionit, pasi një pjesë e popullsisë vijon të emigrojë. Për më tepër vala e re ka përfshirë punonjës me pozicione të mira pune, si mjekë, infermierë, apo specialistë të teknologjisë së informacionit.

Të dhëna të tjera tregojnë se ikja e shqiptarëve drejt vendeve të Bashkimit Europian duket se nuk ka të ndalur. Sipas Eurostat, në vitin 2021 janë dhënë 55.2 mijë leje qëndrimi për shtetasit shqiptarë në një nga vendet e BE-së. Në krahasim me një vit më parë, kur ky proces u bllokua nga pandemia, lejet janë rritur me 47%.

Që nga viti 2008, kur Eurostat raporton të dhënat, shtetet e BE-së kanë dhënë për shqiptarë gjithsej 756 mijë shtetas shqiptarë. Nga institucionet ndërkombëtare, numri i lejeve të qëndrimit për shtetasit e një vendi llogaritet si emigracion. Kjo shifër është gati sa 30% e popullsisë që vlerësohet që jeton aktualisht në Shqipëri.

Cikli i remitancave duket se ndjek në mënyrë të drejtë atë të lejeve të qëndrimit që jepen nga vendet e Bashkimit Europian, teksa pas 2013-s të dy treguesit rezultojnë me rritje. Vala e parë e emigrimit të shqiptarëve ishte në dekadën e parë të tranzicionit, të cilët filluan të merrnin leje qëndrimi pas vitit 2000. Në 2008-n u dhanë gjithsej gati 100 mijë leje qëndrimi sipas Eurostat.

Emigracioni filloi të zbehej pas vitit 2010 dhe në 2013-n regjistrohet numri më i ulët i lejeve, me rreth 30 mijë.

Më pas, në 2015-n filloi një valë e re emigracioni, e reflektuar dhe në kërkesat për azil në vendet e BE-së që atë vit arritën rekordin e rreth 60 mijë.

Ndonëse kërkesat për azil erdhën në rënie vitet e mëpasshme, duke zbritur në rreth 20 mijë në vit, rezulton se shumë persona e kanë gjetur rrugën për të ikur, teksa lejet e qëndrimit arritën deri në 60 mijë në vit./Albinfo.ch

---