Putin deklaron armëpushim 2-ditor me Ukrainën

Keystone

Vladimir Putin njoftoi një armëpushim në Ukrainë nga ora 12 e mesditës së 6 janarit deri në mesnatën e 7 janarit.

Putini i kërkoi Ukrainës të përgjigjet, por Kievi e refuzoi menjëherë kërkesën.

“Mbajeni hipokrizinë për veten tuaj”, tha këshilltari presidencial ukrainas, Mykhailo Podolyak, transmeton euronews, përcjell albinfo ch.

“Duke marrë parasysh apelin e Shenjtërisë së Tij, Patriarkut Kirill, udhëzova Ministrinë e Mbrojtjes së Rusisë që të zbatojë një armëpushim përgjatë vijës së kontaktit nga ora 12:00 e datës 6 janar deri në orën 24:00 të datës 7 ”, thuhet në deklaratën e Kremlinit.
“Për shkak të faktit se një numër i madh i njerëzve ortodoksë jetojnë në zonat e armiqësive, ne i bëjmë thirrje palës ukrainase të shpallë një armëpushim dhe t’i lejojë ata të marrin pjesë në shërbimin në prag të Krishtlindjes, si dhe në ditën e Krishtlindjeve”, shtoi ai.

Shumë të krishterë ortodoksë në Rusi dhe Ukrainë ndjekin kalendarin e vjetër dhe festojnë Krishtlindjet në 6-7 janar.
Kreu i Kishës Ortodokse Ruse, Kirill, më herët i bëri thirrje Moskës dhe Kievit që të vazhdojnë me një armëpushim në Ukrainë me rastin e Krishtlindjeve.

Sipas tij, armëpushimi duhet të shërbejë në mënyrë që “ortodoksët të mund të marrin pjesë në shërbimet e natës së Krishtlindjes” në Ukrainë.