Të pasurit “mbledhin” pasurinë e gjithë globit

Në total, vlera e pasurisë së re të krijuar që nga viti 2020 është 42 trilionë dollarë

Gjatë dy vjetëve të fundit, 1% e njerëzve më të pasur kanë grumbulluar afërsisht dy të tretat e të gjithë pasurisë së re të krijuar në mbarë botën, sipas një raporti të ri nga Oxfam.

Në total, vlera e pasurisë së re të krijuar që nga viti 2020 është 42 trilionë dollarë. Nga kjo shifër, plot 26 trilionë dollarë, ose 63%, është grumbulluar nga 1% e njerëzve ultra të pasur, sipas raportit. Pjesa e mbetur prej 99% e popullsisë globale arriti të mblidhte vetëm 16 trilionë dollarë nga pasuria e re e krijuar, thotë organizata bamirëse globale, shkruan Monitor, transmeton albinfo.ch.

“Një miliarder ka fituar afërsisht 1.7 milionë dollarë për çdo 1 dollar të pasurisë së re globale që është fituar nga një person në 90 përqindëshin e më të varfërve”, thuhet në raportin, i cili u publikua me fillimin e Forumit Ekonomik Botëror në Davos të Zvicrës.

Raporti sugjeron se ritmi me të cilin po krijohet pasuria është përshpejtuar, pasi 1% e më të pasurve në botë kanë grumbulluar rreth gjysmën e të gjithë pasurisë së re gjatë 10 vjetëve të fundit.

Raporti i Oxfam analizoi të dhënat mbi krijimin e pasurisë globale nga Credit Suisse, si dhe shifrat nga Lista e Miliarderëve të Forbes për të vlerësuar ndryshimet në pasurinë e ultra të pasurve.

Studimi vë në kontrast këtë krijim të pasurisë me raportet nga Banka Botërore, e cila tha në tetor të vitit 2022 se ka të ngjarë që të mos përmbushë dot qëllimin e saj për t’i dhënë fund varfërisë ekstreme deri në vitin 2030, pasi pandemia Covid-19 ngadalësoi përpjekjet për të luftuar varfërinë.

Gabriela Bucher, drejtoreshë ekzekutive e Oxfam International, bëri thirrje që taksat të rriten për ultra të pasurit, duke thënë se ky ishte një “parakusht strategjik për uljen e pabarazisë dhe ringjalljen e demokracisë”.

Në deklaratën për shtyp të raportit, ajo tha gjithashtu se ndryshimet në politikat tatimore do të ndihmonin në trajtimin e krizave të vazhdueshme në mbarë botën.

“Taksimi i korporatave super të pasura dhe të mëdha është mënyra për të dalë nga krizat e shumta që po përjetojmë në ditët e sotme. Është koha që të shkatërrojmë mitin se reduktimet e taksave për më të pasurit bëjnë që pasuria e tyre disi ‘të shpërndahet’ te të gjithë të tjerët”, tha Bucher.

Krizat e njëpasnjëshme në mbarë botën që përforcojnë njëra-tjetrën dhe sjellin pasoja akoma më të rënda së bashku sesa po të ndodhnin veç, njihen gjithashtu me termin “polikrizë”. Në javët e fundit, studiues, ekonomistë dhe politikanë kanë sugjeruar se bota aktualisht po përballet me një krizë të tillë, pasi presionet nga kriza e kostos së jetesës, ndryshimet klimatike dhe shumë probleme të tjera po mbivendosen ndaj njëra-tjetrës.

---