Takimi Kurti-Vuçiq shihet si një mundësi unike për marrëveshje normalizimi

Të hënën në Bruksel, nën ndërmjetësimin e BE-së do të mbahet takimi i radhës Kurti-Vuçiq. Kjo po shihet si një mundësi unike për marrëveshje normalizimi mes Kosovës dhe Serbisë.

Përfaqësuesi i lartë i Bashkimit Europian për politikë të jashtme, Joseph Borrell, tha se dialogu Beograd-Prishtinë, i ndërmjetësuar nga BE-ja për normalizimin e marrëdhënieve, është në një moment vendimtar, përcjell albinfo.ch.

Ndërsa ndërmjetësuesi Miroslav Lajçak konfirmoi për Tanjugun serb se në raundin e ri të dialogut do të diskutohet për afatet e zbatimit të propozimit europian që do të sjellë marrëveshjen finale. Lajçak nënvizoi se BE-ja do të ketë një rol kyç në monitorimin e përmbushjes së detyrimeve.