Zjarr në Yverdon (Vaud): 4 anëtarë të një familjeje të vdekur dhe një i zhdukur

Në shtëpi jetonte një familje prej pesë anëtarëve. Thuhet se bëhet fjalë për një çift me tri vajza. Një fëmijë është ende i zhdukur

Katër trupa të pajetë u zbuluan në një shtëpi në Yverdon (VD). Shtëpia ishte shkatërruar plotësisht nga zjarri, transmeton albinfo.ch. Një fëmijë është ende i zhdukur, sipas policisë kantonale të Vaud.

Policia e Vaud citon dëshmitarët që kanë dëgjuar një shpërthim që me gjasë ka shkaktuar zjarrin.

Zjarri ka rënë pak para orës 7 të mëngjesit në një shtëpi pranë qendrës së qytetit. Sipas raportimeve të “24 heures” dhe “20 minuta”, një familje pesanëtarëshe jetonte në shtëpi. Thuhet se bëhet fjalë për një çift me tri vajza.

Në mesditë, njësiti i zjarrfikësve ishte ende në vendngjarje. Zjarri dukej se ishte nën kontroll, pasi nuk shiheshin më flakë, por kishte ende tym, sipas një fotografi të Keystone-SDA në vendngjarje. Një kontingjent i madh i policisë dhe punonjësve të shpëtimit ishte gjithashtu ende në veprim.

Më shumë detaje nuk dihen ende, përcjell albinfo.ch. Policia e Kantonit Vaud ka njoftuar se së shpejti do të japë më shumë informacione.

(Foto: Screenshot srf)

 

---