Kurti: Bojkoti nga serbët erdhi pas presionit nga Beogradi

Zyra e kryeministrit

Kryeministri i Kosovës, Albin Kurti, ka reaguar pas zgjedhjeve të jashtëzakonshme të veriut. Ai tha se bojkotimi i zgjedhjeve ishte nga fushatat kërcënuese të Beogradit dhe “veglave të tij kriminale”.

“Zgjedhjet për kryetar në katër komunat veriore të Kosovës dhe për kuvendet komunale në dy sosh, dje u zhvilluan qetë dhe pa incidente. Falënderoj KQZ-në për organizimin, Policinë e Kosovës për sigurinë dhe qytetarët për mbështetjen. Atmosfera ishte ajo e frikësimit dhe shantazhit, andaj edhe dalja e qytetarëve në zgjedhje ishte e ulët. Bojkoti ishte i imponuar nga fushata kërcënuese e Beogradit zyrtar dhe e veglave të tij kriminale në terren në veri. I falënderoj qytetarët për kurajon dhe qetësinë”, ka shkruar Kurti  përcjell albinfo.ch.

Ai i ka uruar të zgjedhurit, ndërsa tha se krah tyre do të jetë Qeveria e se ata duhet të punojnë me përkushtim dhe të shërbejnë pa dallim.

Erden Atiq nga Lëvizja Vetëvendosje, sipas rezultateve preliminare do të udhëheqë Komunën e Mitrovicës Veriore, Lulzim Hetemi Leposaviqin, Izmir Zeqiri i Partisë Demokratike të Kosovës Zubin Potokun dhe Ilir Peci Zveçanin, përcjell albinfo.ch.

Në këto zgjedhje të jashtëzakonshme votuan vetëm 1567 qytetarë, nga 45095 sa kishin të drejtë vote, ose 3.4%.