Ja si mund të votoni për Shqipërinë në Eurovision

Albina dhe Familja Kelmendi që përfaqësojnë Shqipërinë në Eurovision këtë vit me shumë sukses arritën në finale të edicionit evropian të këngës.

Votat e publikut kanë rol të rëndësishëm që kënga “Duje” të renditet sa më lart.

Këtë vit ka ndryshime në sistemin e votimit, pasi për herë të parë mund të votojnë edhe vendet jopjesëmarrëse, si Kosova.

Juria, e cila nuk kishte të drejtë vote në gjysmëfinale, ka të drejtë të votojë në finalen e madhe, shkruan koha.net.

Votimin mund ta bëni përmes aplikacionit zyrtar “Eurovision Song Contest”, që është në iOS dhe Android, dhe në faqen www.esc.vote, përfshirë edhe nga vendet jopjesëmarrëse.

Votimi hapet pas këngës së fundit dhe zgjat 40 minuta. Dhjetë këngët që marrin më shumë vota nga vendet jopjesëmarrëse do të marrin pikë nga 1 deri në 12. Votat e vendeve jopjesëmarrëse llogariten si votat e një vendi pjesëmarrës, përcjell albinfo.ch.

Publiku, nga vendet pjesëmarrëse në “Eurovision”, jep gjithsej 2204 pikë.

Në finale shënohen edhe votat e jurive kombëtare. 37 prej tyre japin gjithsej 2146 pikë.