Netflix bllokon ndarjen e fjalëkalimit në Itali

@pixabay

Fundi i ndarjes së fjalëkalimit të llogarisë personale në Netflix me miqtë apo të afërmit është zyrtar edhe në Itali.

Mbrëmjen e djeshme platforma e transmetimit të videove iu ka dërguar një e-mail të gjithë abonentëve.

“Llogaria e Netflix është e destinuar për një familje të vetme, pra ju dhe ata që jetojnë me ju. Të gjithë në familjen tuaj mund të shikojnë Netflix kudo që të duan (në shtëpi, në lëvizje, me pushime) dhe të përfitojnë nga veçoritë e reja si Transferimi i Profilit”, thuhet në njoftim, transmeton A2 përcjell albinfo.ch.

Kushdo që nuk është pjesë e “familjes”, pra që nuk jeton nën të njëjtën çati, është ekstra përdorues dhe do të duhet të paguajë një kosto shtesë prej 4.99 në muaj”, thuhet në këtë mesazh.

Rregullat e reja të Netflix i japin fund praktikës së “password sharing”. “Duke filluar nga sot, ne do të fillojmë t’u dërgojmë këtë e-mail abonentëve në Itali që ndajnë fjalëkalimin e llogarisë së tyre të Netflix jashtë shtëpisë së tyre”, sqaron kompania.