Sa kushton udhëtimi me veturë nga Lozana në Marsejë?

(KEYSTONE/Laurent Gillieron)

Të bindur për koston e lartë të udhëtimit me veturë, ku përfshihen tarifat e autostradës, karburani ose pushimet e ushqimit, dy gazetarë të RTS-së nisën një udhëtim nga Lozana për të shkuar në Marsejë.

Ky udhëtim është rreth 500 kilometra dhe zgjat rreth pesë orë e 15 minuta nëse shfrytëzoni autostradën.

Kur arritën në Francë, u desh të paguanin tarifat e autostradave që janë rritur me 4.75% krahasuar me vitin 2022.

Udhëtimi Lozanë – Marsejë për dy persona, nëpërmjet autostradës, kushton sot 44 franga tarifat, 80 franga benzina dhe 18 franga për piknik, pra gjithsej 142 franga, kundrejt 76 frangave gjithsej duke kaluar nëpër rrugët kombëtare, përcjell albinfo.ch.

Në autostradë, me shpejtësi 130 km/orë, mjeti i përdorur nga dy gazetarët konsumon 6.7 litra për 100 kilometra, dy litra më shumë se në rrjetin dytësor ku karburanti është shumë më i lirë, shkruan RTS.

Duke e mbushur makinën me karburant në një pikë karburanti që ndodhet jashtë autostradës, mund të kurseni dhjetë franga. Sidoqoftë, shumica e pushuesve mbushin karburant në autostradë, pasi është më e përshtatshme dhe më e shpejtë.

Dallimet në çmim janë gjithashtu të rëndësishme kur bëhet fjalë për ushqimin dhe pijen. Në një zonë standarde pushimi, një shishe ujë, një pako patate të skuqura dhe një sanduiç kushtojnë rreth 9 franga, tre herë më shumë se jashtë autostradës, përcjell albinfo.ch.

“Ne kemi pikat tona të piknikut. Ne zbresim nga autostrada dhe marrim frymë për një orë, para se të rifillojmë udhëtimin tonë,” tha një pushues.

“Kemi blerë pak kafe në zonën e shërbimit të autostradës, sepse është më e lehtë dhe është nxehtë. Me fjalë të tjera, është një termos më pak në makinë”, tha një tjetër udhëtar, shkruan RTS.