Policia e Kosovës bastis shtatë lokacione në veri, konfiskon municion e eksplozivë

Foto FB: Kosovo Police

Policia e Kosovës përmes një komunikatë të përbashkët me Prokurorinë Speciale ka njoftuar se ka kryer kontrolle në shtatë lokacione në veri të vendit që lidhen me ngjarjet e 24 shtatorit 2023, ku janë gjendur armë, municion, mjete shpërthyese dhe pajisje të tjera ushtarake.

Sipas njoftimit, kontrollet janë kryer në lokacione të ndryshme, katër në Mitrovicën e Veriut, dy në Zveçan dhe një në Banjskë, shkruan albinfo.ch.

“Pjesëmarrës në këto kontrolle ishin edhe zyrtarë nga EULEX-i, kurse te Tre rrokaqiejt prezent kanë qenë edhe EOD -KFOR-i, po ashtu EOD e Policisë së Kosovës është në vend të ngjarjes”, thuhet në njoftim.

“Lista preliminare e armëve dhe pajisjeve të tjera të sekuestruara:

• 87 copë eksploziv të tipit TM 100
• 3 granata hedhës dore (zola)
• 1 armë automatike AK-47
• 1 minë kundër këmbësorisë e tipit MRUD
• 14 karikatorë
• Municion të kalibrave të ndryshëm
• 63 detonatorë elektrikë
• 23 detonatorë mekanikë
• 1 orë për aktivizim
• 1 granatë dore M79
• 3 tuba fitila ndezës
• Çanta, radiolidhje, antiplumba, pajisje medicionale, gjyksore (jelek për bartje të karikatorëve), maskë kundër gazit, bateri etj.”, bën të ditur njoftimi.