Në çka shpenzojnë më shumë zviceranët

Në përgjithësi, në nëntë muajt e parë të 2023-ës shitjet u rritën (në bazë vjetore) me 1.4%

Qarkullimi i shitjes me pakicë në Zvicër po vuan: njerëzit po shpenzojnë më pak për artikujt joushqimorë, del nga vlerësimet e publikuara nga instituti i kërkimit të tregut GfK.

Në përgjithësi, në nëntë muajt e parë të 2023-ës, shitjet u rritën (në bazë vjetore) me 1.4%, raporton kompania me qendër në Rotkreuz (ZG), transmeton albinfo.ch. Megjithatë, në periudhën në fjalë, inflacioni është luhatur ndërmjet 1.6% dhe 3.4%.

Forca shtytëse e blerjeve ishte sektori ushqimor, i cili – sërish sipas analizave të Gfk – shënoi +3,7%. Nga ana tjetër, segmenti joushqimor po pëson rënie të ndjeshme, duke rënë me -1.9%.

“Faktorët e jashtëm si inflacioni, konfliktet dhe ndryshimet klimatike kanë një ndikim në rritje në tregjet dhe sjelljen e konsumatorëve”, komentojnë specialistët e Gfk. “Besimi dukshëm më i ulët se mesatarja e konsumatorit, qasja më e ndërgjegjshme ndaj blerjeve dhe tendenca drejt produkteve të rinovuara dhe të përdorura kanë një ndikim të rëndësishëm në tregtinë me pakicë zvicerane”, shtojnë specialistët.

 

---