Moldavia i vendos sanksione, Rusia zotohet se do t’i përgjigjet

Keystone

Moldavia i është bashkuar pakos më të madhe të sanksioneve evropiane kundër Rusisë, për shkak të pushtimit të Ukrainës nga Moska, për çka Ministria e Jashtme e Rusisë ka thënë se “nuk do ta lërë pa përgjigje” vendimin e Moldavisë për të vendosur sanksione kundër saj, si pjesë e pakos së sanksioneve të Bashkimit Evropian ndaj Moskës, përcjell albinfo.ch.

Sanksionet kanë për cak qindra njerëz, përfshirë nga Moldavia, apo njerëz që kanë punuar në rajonin e ndarë nga Moldavia me mbështetjen e Kremlinit, Transdniester, vend në të cilin Rusia i ka mbi 1.000 trupa.

Zëdhënësja e Ministrisë së Jashtme të Rusisë, Maria Zakharova, u shpreh se vendimi nuk është në përputhje me “interesat e banorëve” të Republikës së Moldavisë dhe se “shumica dërrmuese” e moldavianëve kanë qasje miqësore ndaj Rusisë, sipas REL.

Në anën tjetër, sondazhet publike në Moldavi e tregojnë të kundërtën: mbi 38% e qytetarëve moldavianë besojnë se Rusia e nisi një pushtim të paprovokuar të Ukrainës dhe vetëm 17% i besojnë narratives së Kremlinit se ky është “një operacion i çlirimit”.

Për shkak të pushtimit rus të Ukrainës, marrëdhëniet e Kishinievit me Moskën janë përkeqësuar shpejt, teksa presidentja e Moldavisë, Maia Sandu, e akuzon Moskën për komplot për të kryer puç kundër Qeverisë proevropiane në Kishiniev dhe se po përpiqet ta destabilizojë vendin e saj.