Cyrih: Njerëzit me ndihma sociale mund të posedojnë veturë

Me një epërsi minimale votash (85 kundrejt 81) kanë fituar kundërshtarët e këtij ndryshimi të kërkuar nga SVP dhe FDP

Në Parlamentin e Kantonit të Cyrihut ka dështuar ndryshimi i kërkuar i ligjit mbi ndihmat sociale  me të cilin kërkohej që personat me ndihmë sociale të mos kenë të drejtë të mbajnë veturë. Me një epërsi minimale votash (85 kundrejt 81) kanë fituar kundërshtarët e këtij ndryshimi të kërkuar nga SVP dhe FDP. Në leximin e parë të projektligjit, raporti kishte qenë 87 me 84 në favor të propozuesve për ndryshimin e ligjit ë fjalë.

Ndryshimi i ligjit kërkonte, veç tjerash që shpenzimet për mbajtjen e një automobili, të mos mbulohen nga ndihma sociale. E njëjta gjë do të vlente edhe në rastet kur vetura do t`i jepej në shfrytëzim nga personi i tretë personit me ndihmë sociale. Përjashtimet do të ishin të mundshme   në rastet kur personi që merr ndihma sociale është i detyruar të ketë makinë për shkak të sëmundjes, nevojave të veçanta dhe shkaqe profesionale.

Komisioni përgatitor për siguri sociale dhe shëndetësi ashtu sikurse edhe Qeveria e Kantonit kishin kundërshtuar ndryshimin e ligjit në këtë pikë. Sipas tyre, pronësia dhe përdorimi i mjeteve motorike ishin mjaft të kufizuara edhe pa këtë ndryshim, shkruan srf.ch.

Drejtori për Siguri në Kantonin e Cyrihut, Mario Fehr (SP) ka thënë me këtë rast se një rregullim i tillë, i ri, i ligjit nuk do të kishte shanse të mbrohej në gjykata, pasi që at do t`u jepnin të drejtë personave me ndihma sociale për të poseduar veturë. Si shembuj ai ka prezantuar rastet në kantonet si Basel-Stadt, Solothurn, Graubünden dhe Bernë. Për shkak të vendimeve refuzuese gjyqësore kantonet në fjalë janë detyruar të tërhiqeshin  nga vendimi i tyre për ndalim.