Nuk u thirr për evropian, Cikalleshi largohet nga kombëtarja e Shqipërisë

Foto: FSHF

Sokol Cikalleshi është në mesin e futbollistëve shqiptarë që u lanë jashtë listës së përzgjedhësit të Shqipërisë, Sylvinho për Euro 2024.

Ai të martën njoftoi se tërhiqet nga Kombëtarja e Shqipërisë në futboll.

“Rrugëtimet janë të bukura, me uljet e ngritjet e veta. Gjatë rrugëtimit, nëse gjërat i ke bërë si duhet, fundi është i lumtur, ndonëse jo gjithmonë e zgjedhim vetë mënyrën. Ka qenë krenari dhe emocion i papërshkrueshëm përfaqësimi i fanellës së ekipit kombëtar të futbollit. Bartja e emocioneve të një kombi mbi shpinë është sa privilegj aq edhe përgjegjës që më ka bërë të përulur dhe mirënjohës ndaj çdokujt që më besoi, ndaj çdokujt që më dha kurajë për të vazhduar. E pa dyshim, në mënyrë të veçantë, ndaj çdokujt që brohoriti për mua”, ka shkruar Cikalleshi në një postim në rrjetet sociale.

Cikalleshi për kohë të gjatë ka qenë sulmuesi kryesor i kuqezinjve.

Pjesë e Shqipërisë sulmuesi i fuqishëm ishte për një dekadë. Në 58 ndeshje ka realizuar 13 gola.