Rritet numri i grave në bordet e ndërmarrjeve të mëdha

Gjatë pesë viteve të fundit, çdo i treti vend vakant në bordet drejtuese të ndërmarrjeve në fjalë është zënë nga femrat

Numri i grave në pozitat udhëheqëse të ndërmarrjeve të mëdha zvicerane nuk është as për së afërmi i kënaqshëm. Megjithatë, sipas një raporti të firmës për ndërmjetësim të punës Guido Schilling AG, duke filluar nga viti 2010 e këndej është shënuar një rritje e konsiderueshme e këtij numri në 100 ndërmarrjet të mëdha të Zvicrës.

Gjatë pesë viteve të fundit, çdo i treti vend vakant në bordet drejtuese të ndërmarrjeve në fjalë është zënë nga femrat, shkruan srf.ch. Por edhe me këtë, kuota e femrave në këto borde është rritur vetëm nga 10 në 15 për qind.

Ndërsa përqindja e femrave në kreun e ndërmarrjeve të mëdha është edhe më e vogël. Ajo është sot 6 për qind ndërsa para dhjetë vitesh ka qenë 4 për qind, bën të ditur raporti i përpiluar nga Guido Schilling AG, i publikuar sot.