BE: Zvicra të rivotojë “Iniciativën kundër Migrimit Masiv”

"Një negocim i ri i marrëveshjes për lëvizje të lirë i BE-së me Zvicrën është jashtë çdo diskutimi

Një kthesë në jetësimin e iniciativës së SVP-së kundër migracionit masiv. 14 muaj pas votimit të saj, Bashkimi Evropian këmbëngul që një votim tjetër me këtë temë është i pashmangshëm. Kështu ka kërkuar udhëheqësi i bisedimeve nga ana e BE-së, Maciej Popowski.

Ai në një intervistë për disa gazeta zvicerane në gjuhën frënge ka thënë se populli i Zvicrës patjetër duhet që deri në vitin 2016 të marrë edhe një vendim, shkruan azonline.ch. Kjo për faktin se, siç ka thënë ai, “një negocim i ri i marrëveshjes për lëvizje të lirë i BE-së me Zvicrën është jashtë çdo diskutimi.

Është e paimagjinueshme të bëhet një hap mbrapa. Klauzolat mbrojtëse i takojnë të kaluarës, ka thënë ai, transmeton albinfo.ch.

Popowski ka shtuar se edhe caktimi i kontingjenteve për punëtorët e huaj ose i përparësisë së vendësve refuzohet nga Brukseli.

Në përgjithësi sipas polakut i cili ka ardhur në postin e shefit të diplomacisë së BE-së në vend të David O`Sullivan, i mbetet Zvcrës të propozojë rrugëdaljen nga qorrsokaku.