Deri në 35 % e njerëzve kanë problem me obezitet në Maqedoni

Sipas projeksioneve, brenda dhjetë viteve do të rritet me 50 për qind

Nga 30 deri në 35 për qind e njerëzve në Maqedoninë Veriore kanë problem me obezitetin, ndërsa në botë kjo shifër arrin në një miliard.

Sipas projeksioneve, brenda dhjetë viteve do të rritet me 50 për qind, dhe kjo jo vetëm në vendet e zhvilluara, por edhe në vendet në zhvillim.

Nuk është problem vetëm i popullatës që ka kushte më të mira jetese, por edhe i vendeve që janë në zhvillim, theksoi ministri i Shëndetësisë, Arben Taravari, me rastin e Ditës Botërore të Obezitetit, shkruan TV21, transmeton albinfo.ch.

“Ne si Ministri e Shëndetësisë, së bashku me Fondin e Sigurimeve Shëndetësore, dëshirojmë të mburremi se këtë vit tashmë kemi terapi me insulinë dhe gjithçka që u nevojitet personave me diabet, tashmë është siguruar dhe jemi në proces të sigurimit të rreth 10-20 për qind më shumë. Trajtim do të ketë edhe për pacientët me diabet dhe obezitet, të cilët trajtohen me terapi specifike. Këtë vit, ky numër do të rritet me 200 pacientë të tjerë, që është një numër relativisht i madh”, tha Arben Taravari, ministër i Shëndetësisë.

“Ideja është që kur ka indikacione të forta mjekësore, jo estetike, këtu indikacione të forta mjekësore, kur pesha nuk mund të kontrollohet në asnjë mënyrë tjetër, t’i qasemi kësaj metode ndërhyrjeje. Këtu duhet të pranojmë se obezitetin nuk e shohim më si problem estetik, por si problem shëndetësor dhe si investim në shëndetin e individëve, sepse disa gjëra si diabeti nuk mund të zgjidhen pa rregullimin e peshës”, shtoi Sasho Klekovski, drejtor i Fondit për Sigurime Shëndetësore.

---