I dërguari i BE-së: Kompromiset në dialog i përcaktojnë palët

I dërguari i Bashkimit Evropian për dialogun Kosovë-Serbi, Peter Sorensen, ka thënë se prioriteti i tij do të jetë sigurimi i takimeve mes përfaqësuesve të dy vendeve.

Ai ka deklaruar se vetë palët do të vendosin për kompromiset e mundshme.

“Dialogu ka për qëllim të sigurojë që të ketë takime. Se a do të thotë kjo kompromise apo jo, u takon palëve për ta përcaktuar”, u shpreh ai, transmeton albinfo.ch.

Sa i përket takimit me kryeministrin Albin Kurti, ai e cilësoi atë si një “fillim të mirë”.

“Ishte një takim prezantues. Folëm për atë se si mund të vazhdojë procesi përpara. Është një fillim i mirë. Sapo t’i kem bërë këto biseda [me përfaqësuesit e Kosovës dhe Serbisë], mund të ulem dhe të vlerësoj se ku jemi. Por, është shumë e qartë që procesi i dialogut përfshin një numër të madh zhvillimesh të rëndësishme dhe duhet të merremi edhe me to”, shtoi Sorensen.