Zvicër: Shkalla e papunësisë mbeti në 2.9 për qind në muajin mars

Në të gjithë Zvicrën, 132.569 persona janë regjistruar si të papunë në qendrat rajonale të punësimit (RAV) në fund të marsit

Në Zvicër, numri i të papunëve ka shënuar një rënie të lehtë në muajin mars. Megjithatë, shkalla e papunësisë ka mbetur në nivelin e një muaji më parë.

Në të gjithë Zvicrën, 132.569 persona janë regjistruar si të papunë në qendrat rajonale të punësimit (RAV) në fund të marsit, siç njoftoi të premten Sekretariati Shtetëror për Çështje Ekonomike (Seco), transmeton albinfo.ch. Kjo ishte 2.877 persona ose 2.1 për qind më pak se në shkurt.

Shkalla e papunësisë ka mbetur në 2.9 për qind. E rregulluar sezonalisht, norma është rritur në 2.8 nga 2.7 për qind, siç ka njoftuar më tej Seco. Në varësi të periudhës së vitit, luhatjet sezonale mund të ndikojnë në vlerat në disa sektorë. Kjo ndikon, ndër të tjera, në lëmenjtë e ndërtimit dhe hotelierisë.

Pamja sa u përket punëkërkuesve pothuajse nuk ka ndryshuar. Në mars, gjithsej 212.390 njerëz u regjistruan në RAV në kërkim të një pune. Kjo është një rënie e lehtë prej 309 personash krahasuar me muajin shkurt. Prandaj, shkalla e punëkërkuesve mbeti në 4.6 për qind, shkruan sda.ch.

Në mars ka pasur më pak vende të lira pune se në shkurt. Në RAV u raportuan 42.530 vende të lira pune, një rënie prej 4.2 për qind. Pak më shumë se gjysma e vendeve të lira të punës i nënshtroheshin kërkesës për raportim, e cila vlen për profesionet me një shkallë papunësie prej të paktën 5 për qind.

---