Zbritet norma referenciale për qiratë

Qiramarrësit në Zvicër mund të presin një zbritje të çmimit të qirasë për banesat apo hapësirat tjera që shfrytëzojnë me qira. Këtë e bën të mundur ulja e normës referenciale për 0.25 për qind, që është e para që nga shtatori i vitit 2013.

Tash, kjo normë është 1.75 për qind dhe kjo u mundëson qiramarrësve të pretendojnë zbritjen e çmimit të qirave të tyre për 2.91 për qind. Norma e publikuar së fundi, në muajin mars, ka qenë 2.0 për qind.

Siç bën të ditur Zyra Federale për çështje banesore, norma e re referenciale hyn në fuqi nga 2 qershori (nesër). Kjo domethënë se në gjithë Zvicrën nga kjo datë, norma në fjalë do të shërbejë si bazë për ndërtimin e çmimit të qirave në gjithë Zvicrën.