Zjarr i madh në impiantin e riciklimit në Tirolin Lindor

Foto: @Esterreicherr, X

Një zjarr i fuqishëm ka përfshirë që nga mesdita e së shtunës ambientet e një impianti riciklimi në Nußdorf-Debant, duke shkaktuar ndërprerje të shumta në rajonin e Tirolit Lindor dhe duke mobilizuar më shumë se 200 forca të emergjencës nga gjithë rajoni. Zjarri, i cili u përhap me shpejtësi gjatë pasdites së së shtunës, është nën kontroll të pjesshëm, por operacionet e shuarjes vazhdojnë intensivisht edhe të dielën, shkruan Krone, transmeton albinfo.ch.

Sipas kreut të Qendrës Tiroleze për Menaxhimin e Krizave dhe Fatkeqësive, Elmar Rizzoli, prioriteti gjatë natës ishte parandalimi i përhapjes së mëtejshme të flakëve jashtë territorit të impiantit, që është arritur me ndihmën e topave uji me rreze të gjatë veprimi. Megjithatë, Rizzoli konfirmoi se rreziku mbetet i lartë, dhe banorët në zonat përreth vazhdojnë të paralajmërohen të mbajnë dritaret e mbyllura dhe të shmangin aktivitetet në natyrë.

Zjarri shpërtheu rreth orës 13:30 të së shtunës, duke shkaktuar tym masiv dhe shpërthime të dhunshme, që detyruan autoritetet të aktivizojnë paralajmërime të menjëhershme për rrezik nëpërmjet mesazheve në celularët e banorëve në Nußdorf-Debant, Lienz, Iselsberg-Stronach, Lavant, Tristach, Dölsach dhe më vonë edhe në Nikolsdorf.

Zjarri çoi gjithashtu në pezullimin e trafikut hekurudhor ndërmjet Lienz dhe Oberdrauburg, si dhe ndërprerje të energjisë elektrike në zonën përreth. Autoritetet u përpoqën gjithashtu të mbronin linjat elektrike dhe shtyllat pranë impiantit, për të shmangur dëme të mëdha infrastrukturore, transmeton albinfo.ch.

Për shkak të rrezikut të madh për jetën, ekipet e emergjencës nuk mundën të ndërhynin direkt fillimisht. Vetëm pas vendosjes së një perimetri sigurie zjarri, filluan përpjekjet e organizuara për ta vënë situatën nën kontroll. Ndërkohë, disa automjete zjarrfikëse janë dëmtuar nga flakët dhe pesë zjarrfikës kanë pësuar lëndime.

Të shtunën pasdite, për të garantuar burime të mjaftueshme njerëzore dhe teknike, autoritetet anuluan zyrtarisht ndezjen e zjarreve tradicionale të Zemrës së Shenjtë në Tirolin Lindor. Forcat zjarrfikëse deklaruan se nuk do të ishin më të disponueshme në rast emergjencash të tjera.

Përforcime shtesë janë dërguar në vendngjarje nga Kufstein, Kitzbühel dhe Karinthia e Epërme, të cilët kanë sjellë me vete automjete zjarrfikëse me tanke uji, pompa dhe pajisje të specializuara. Sipas autoriteteve, nuk dihet ende se sa do të zgjasë operacioni i shuarjes së zjarrit, por paralajmërimet për popullsinë dhe masat e sigurisë do të mbeten në fuqi derisa situata të jetë plotësisht e sigurt, transmeton albinfo.ch.