Pse shumica e të huajve nuk duan të jetojnë në fshatrat zvicerane?

Një numër studimesh kanë treguar se numri më i madh i të huajve jetojnë në qytete të mëdha zvicerane dhe zona përreth qendrave urbane, në vend që të jetojnë në fshat. Pse ndodh kjo?

Hulumtimi i fundit i tillë, i kryer nga grupi konsulent Wuest Partner si pjesë e analizës së tyre mbi ndikimin që shtetasit e huaj kanë në tregun e banesave në Zvicër, tregon se “familjet e emigrantëve kryesisht duan të vendosen në zona urbane”.

“Vetëm rreth një e treta e tyre e konsiderojnë zhvendosjen në fshat, krahasuar me 40 përqind të zviceranëve”, zbuloi studimi.

Shtetasit e huaj preferojnë qytetet edhe pse, sipas të njëjtës analizë, kushtet e tyre të jetesës atje nuk janë të barabarta me ato të shtetasve zviceranë.

Imigrantët zakonisht zënë banesa më të vogla në qytete, në raport me zviceranët, përcjell albinfo.ch.

Ky boshllëk reflektohet edhe në hapësirën e jetesës për person, e cila është dukshëm më e ulët për të huajt sesa për zviceranët.

Pse, atëherë, të huajt dynden në qytete, edhe pse qiratë janë më të larta atje dhe banesat janë të pakta?

Kjo pyetje trajtohet, të paktën pjesërisht, nga të dhënat zyrtare që tregojnë se gati 40 përqind e emigrantëve vijnë në Zvicër për të punuar (arsye të tjera përfshijnë ribashkimin familjar, martesën me një shtetas zviceran dhe studimin).

Prandaj, të huajt i japin përparësi afërsisë me vendin e punës  i cili zakonisht ndodhet në qendrat urbane dhe jo në zonat rurale – gjatësisë së udhëtimit për në punë me makinë ose transport publik, si dhe pranisë së shkollave në afërsi.

Paradoksalisht, kjo preferencë e theksuar për jetesën urbane ka krijuar mungesë strehimi, pasi kërkesa për strehim me qira tejkalon ofertën në shumë qytete.

 

Por të huajt preferojnë qytetet edhe për arsye të tjera

Hulumtime të tjera, të cilat gjetën “një prani të fortë të huaj” në dhe përreth qyteteve të mëdha që janë afër qendrave ekonomike dhe mundësive të punës, treguan se ky fenomen ka edhe një komponent të fortë kulturor.

Në mënyrë specifike, kjo do të thotë që emigrantët duan të jetojnë midis, ose në afërsi të, të huajve të tjerë  mundësisht të së njëjtës kombësi.

Cilat nga zonat urbane të Zvicrës janë më tërheqëse për të huajt?

I njëjti studim tregon se një përqendrim i madh i shtetasve të huaj mund të gjendet në Cyrih, Gjenevë, Bazel, Zug, si dhe në zonën përreth Lozanës, sepse një numër kompanish të mëdha ndërkombëtare ku punojnë shumë emigrantë kanë selinë atje.

---