Parlamenti: Më shumë dënime me burg dhe më pak me gjobë

Pas një periudhe kur për delikte të vogla dhe të mesme më shumë rekomandoheshin dënimet me gjobë, trendi sërish po shkon drejt dënimeve me burg. Për një praktikë të tillë janë pajtuar edhe dy dhomat e Parlamentit të Zvicrës, të cilat së bashku janë marrë vesh të krijojnë parakushtet për ndryshimin e praktikës në fjalë.

Kështu, në të ardhmen, gjyqtarët mund të shqiptojnë dënime me para vetëm deri në 180 njësi ditore dhe jo sikurse ka qenë deri më tash, 360. Me këtë synohet që më shumë delikte të sanksionohen me dënime me burg se sa me para, shkruan srf.ch.

Veç kësaj, gjyqtarët do të kenë të drejtë që të sanksionojnë me heqje lirie edhe të dënuarit me tri ditë. Megjithatë, në rastet e delikteve të vogla dënimet me gjobë do ë kenë edhe më tutje përparësi.
Fillimisht, parlamenti synonte të hiqte fare nga lista dënimet me gjobë me kusht por pastaj ka hequr dorë nga kjo.