Migros feston 100 vjet

Migros feston 100 vite inovacion dhe përballueshmëri

Më 15 gusht 1925, Gottlieb Duttweiler themeloi Migros, duke sjellë një revolucion në tregun zviceran: shitjen direkte te konsumatorët me çmime deri në 40% më të ulëta se konkurrenca. Fillimisht, pesë kamionë me gjashtë produkte të thjeshta, sheqer, sapun, oriz, kafe, makarona dhe yndyrë kokosi nisën rrugën nga Cyrihu drejt dyqaneve, përcjell albinfo.ch.

Pas sfidave të hershme dhe bojkotimeve nga furnizuesit, Duttweiler prodhoi vetë artikujt e Migros, duke vendosur themelet e një kooperative që do të shndërrohej në simbol kombëtar. Në vitin 1946 u hap dyqani i parë i vetëshërbimit në Cyrih, i pari në Evropë, ndërsa në vitet ’50 dhe ’60 Migros u rrit si një gjigant i shitjes me pakicë dhe model i kapitalizmit social, duke ofruar shërbime kulturore, trajnime dhe kujdes për komunitetin.

Migros feston 100-vjetorin me 1.3 milion trëndafila për klientët

 

Në Ticino, kooperativa rajonale e parë u krijua në 1933, duke përhapur filozofinë e çmimeve të përballueshme dhe qasje gjithëpërfshirëse. Sot, Migros ka rreth 98,000 punonjës, 2.3 milionë anëtarë kooperativë dhe të ardhura vjetore prej rreth 32.5 miliardë CHF.

Viti 2024 shënoi një rikthim në rrënjët e kompanisë nën CEO-n Mario Irminger, me fokus tek shitja me pakicë, shërbimet financiare dhe kujdesi shëndetësor, duke shitur ose mbyllur markat e specializuara dhe duke ruajtur qëndrueshmërinë ekonomike.

---