Majlinda, bajraktarja e Kosovës në “Baku 2015”

Republika e Kosovës ka shënuar historinë, duke parakaluar për herë të parë si shtet i pavarur në Lojërat Olimpike Evropiane që po mbahen në Baku të Azerbajxhanit. Flamurin e Kosovës e ka mbajtur kampionia botërore dhe evropiane e xhudos, Majlinda Kelmendi që konsiderohet si “krenaria e vednit”.

Kosova në këto gara evropiane përfaqësohet me tetëmbëdhjetë sportistë, ndërsa në palestër ka parakaluara edhe Shqipëria, e cila sivjet merr pjesë me 28 sportistë.

Ndryshe, ditë më parë, Majlinda Kelmendi e mori flamurin shtetëror nga presidentja e Kosovës, Atifete Jahjaga. Xhudistja kosovare shkon në “Baku 2015” me shumë optimizëm, për ta sjell në Prishtinë medaljen e parë olimpike.

Kjo, ndërkaq është hera e parë që Kosova përfaqësohet si shtet në Lojërat Olimpike Evropiane. Kjo pjesëmarrje erdhi pasi Komiteti Olimpik Ndërkombëtar pranoi Kosovën me të drejta të plota anëtare e KON-it, dhe pas këtij pranimi pasuan edhe shumë njohje të sporteve të tjera.