Rritet numri i rasteve të gripit të shpendëve në Gjermani

Zogjtë e egër që migrojnë drejt jugut konsiderohen përhapësit kryesorë të gripit të shpendëve

Numri i rasteve të gripit të shpendëve në Gjermani vazhdon të rritet, njoftuan sot autoritetet.

Që nga zbulimi i rasteve të para në shtator, janë regjistruar mbi 31 shpërthime në fermat tregtare të shpendëve dhe 131 raste të gripit të shpendëve në zogjtë e egër, sipas Institutit Friedrich Loeffler (FLI), që monitoron shëndetin e kafshëve.

Sipas autoriteteve. më shumë se 500 mijë pula, rosa, patë dhe gjela deti  janë prekur në fermat gjermane.

Në disa lande gjermane janë therur mijëra shpendë si masë parandaluese, pasi analizat e FLI-së konfirmuan infeksione me virusin shumë ngjitës H5N1, shkruan ATSH, transmeton albinfo.ch.

Zogjtë e egër që migrojnë drejt jugut konsiderohen përhapësit kryesorë të gripit të shpendëve.

Edhe pse sëmundja tashmë është e pranishme gjatë gjithë vitit në Gjermani, rreziku i infektimit rritet ndjeshëm gjatë migrimit vjeshtor.

Pika kulmore e migrimit të shpendëve ende nuk ka mbërritur, çka e mban të lartë rrezikun e përhapjes së virusit në fermat e shpendëve.

Fermerët janë këshilluar të zbatojnë rreptësisht protokollet e higjienës dhe të shmangin çdo kontakt mes shpendëve të tyre dhe zogjve të egër.

---